பல கோடி ரூபாய் வெளிநாட்டு வேலைவாய்ப்பு மோசடி!

சமூக ஊடகங்கள் ஊடாக வெளிநாட்டு வேலைவாய்ப்பு வழங்குவதாகக் கூறி, பல கோடி ரூபாய் பண மோசடியில் ஈடுபட்ட பிரதான சந்தேகநபர் ஒருவரை குச்சவெளி பொலிஸார் அதிரடியாகக் கைது செய்துள்ளனர்.

பாதிக்கப்பட்ட பலரால் விடுக்கப்பட்ட தொடர் முறைப்பாடுகளின் அடிப்படையிலேயே இந்த கைது நடவடிக்கை முன்னெடுக்கப்பட்டுள்ளதாக பொலிஸார் தெரிவித்துள்ளனர்.

பொலிஸாரின் ஆரம்பகட்ட விசாரணைகளின்படி, கைது செய்யப்பட்ட சந்தேகநபர்: கிண்ணியா பகுதியை பிறப்பிடமாகக் கொண்டவர்.
தற்போது குச்சவெளி பிரதேசத்தில் திருமணமுடித்து குடும்பத்துடன் தொடர்புடையவர். நீண்டகாலமாக கொழும்பில் வசித்து வந்தவர் என அடையாளம் காணப்பட்டுள்ளார்.

ஏமாற்றியது எப்படி?
சந்தேகநபர் முகநூல் (Facebook) உள்ளிட்ட சமூக ஊடகங்களில், வெளிநாடுகளில் அதிக சம்பளத்துடன் கூடிய வேலைவாய்ப்பு என கவர்ச்சிகரமான விளம்பரங்களை பதிவிட்டுள்ளார். இதனை நம்பி அவரைத் தொடர்புகொண்ட பல இளைஞர்கள் மற்றும் பொதுமக்களிடமிருந்து, தலா இலட்சக்கணக்கில் தொடங்கி பல கோடி ரூபாய் வரை சுருட்டியுள்ளமை விசாரணைகளில் தெரியவந்துள்ளது.
பணத்தைப் பெற்றுக்கொண்ட பின்னர், அவர் வேலைவாய்ப்புகளையும் வழங்கவில்லை

வாங்கிய பணத்தையும் திருப்பித் தராமல் ஏமாற்றி வந்துள்ளார். இதனால் பாதிக்கப்பட்டவர்கள் நாட்டின் பல்வேறு பகுதிகளிலிருந்தும் பொலிஸ் நிலையங்களில் முறைப்பாடு செய்துள்ளனர்.
அடுத்தகட்ட நடவடிக்கை
கைது செய்யப்பட்ட சந்தேகநபர் தற்போது குச்சவெளி பொலிஸ் நிலையத்தில் தடுத்து வைக்கப்பட்டு தீவிர விசாரணைக்கு உட்படுத்தப்பட்டு வருகிறார்.
இச்சம்பவம் தொடர்பான மேலதிக விசாரணைகளுக்காக சந்தேகநபரை கொழும்பு குற்றத்தடுப்பு பிரிவிடம் (CCD) ஒப்படைப்பதற்கான ஏற்பாடுகள் செய்யப்பட்டுள்ளன என குச்சவெளி பொலிஸார் தெரிவித்தனர்.

பொலிஸாரின் அவசர எச்சரிக்கை!
இச்சம்பவத்தை அடுத்து பொதுமக்கள் விழிப்புடன் இருக்குமாறு பொலிஸார் அவசர எச்சரிக்கை விடுத்துள்ளனர்:

சமூக ஊடகங்கள் மூலம் வெளிநாட்டு வேலைவாய்ப்புகளை வழங்குவதாகக் கூறும் நபர்கள் அல்லது நிறுவனங்களை நம்பி ஏமாற வேண்டாம்.
வெளிநாடு செல்ல விரும்புவோர், இலங்கை வெளிநாட்டு வேலைவாய்ப்புப் பணியகத்தின் (SLBFE) அரச அங்கீகாரம் பெற்ற முகவர்களிடமிருந்து மட்டுமே சேவைகளைப் பெற்றுக்கொள்ள வேண்டும்.