திருகோணமலை நிலாவெளி கடற்கரைக்குச் சுற்றுலா வந்த நபர் மீட்பு

திருகோணமலை நிலாவெளி பொது கடற்கரைக்குப் பாரம்பரியமாகச் சுற்றுலா வந்திருந்த நபர் ஒருவர், எதிர்பாராதவிதமாக நீண்ட நேரமாகக் காணாமல் போயிருந்த நிலையில், பத்திரமாக மீட்கப்பட்டு அவரது நண்பர்களிடம் ஒப்படைக்கப்பட்டுள்ளார்

சம்பவம் குறித்துத் தெரியவருவதாவது
இன்று நிலாவெளி கடற்கரைக்கு நண்பர்களுடன் சுற்றுலா வந்திருந்த நபர் ஒருவர், திடீரெனக் காணாமல் போயுள்ளார். இதனால் பதற்றமடைந்த அவரது நண்பர்கள் அவரைப் பல இடங்களில் தேடியும் கண்டுபிடிக்க முடியவில்லை. இந்த நிலையில், போதை தலைக்கேறிய நிலையில் அவர் வீதியோரமாகத் தூங்கிக் கொண்டிருப்பதைச் சில பொதுமக்கள் அவதானித்துள்ளனர்.

உடனடியாக, இதுகுறித்த தகவல் மற்றும் புகைப்படம் திருகோணமலை சுற்றுலா மகா சங்கத்தின் உத்தியோகபூர்வ வாட்ஸ்அப் (WhatsApp) குழுவில் பதிவிடப்பட்டது

இப்பதிவை உன்னிப்பாகக் கவனித்த சங்கத்தின் உறுப்பினர்கள், உடனடியாகச் செயற்பட்டு தேடுதல் வேட்டையில் இறங்கினர்.

உரியவர்களிடம் ஒப்படைப்பு
இத்தேடுதல் முயற்சியின் பலனாக, திருகோணமலை சுற்றுலா மகா சங்க அங்கத்தவர்கள் அந்த நபர் இருந்த இடத்தை விரைவாகக் கண்டறிந்து, அவரைப் பத்திரமாக மீட்டனர். பின்னர், பதற்றத்துடன் தேடிக் கொண்டிருந்த அவரது நண்பர்களைத் தொடர்பு கொண்டு, மீட்கப்பட்ட நபரை அவர்களிடம் பத்திரமாக ஒப்படைத்தனர்

கிராம மக்கள் மற்றும் நண்பர்கள் நன்றி
தமது நண்பனைப் பத்திரமாக மீட்டுக் கொடுத்ததற்காக, சுற்றுலா வந்த நண்பர்கள் குழுவினர் திருகோணமலை சுற்றுலா மகா சங்க உறுப்பினர்களுக்கு

நெஞ்சார்ந்த நன்றிகளைத் தெரிவித்துக் கொண்டனர். அத்துடன், இக்கட்டான இச்சூழ்நிலையில் துரிதமாகச் செயல்பட்டு உதவிய கோபாலபுரம் கிராம மக்களுக்கும் மற்றும் திருகோணமலை சுற்றுலா மகா சங்கத்திற்கும் அப்பகுதி மக்களும், சுற்றுலாப் பயணிகளும் தங்களது பாராட்டுகளையும் மனமார்ந்த நன்றிகளையும் தெரிவித்துள்ளனர்.

சுற்றுலாப் பயணிகளின் பாதுகாப்பை உறுதி செய்வதில் சுற்றுலா மகா சங்க உறுப்பினர்களின் இந்தத் துரித நடவடிக்கை பெரும் வரவேற்பைப் பெற்றுள்ளது.