தம்புள்ளை – சிகிரியாவை மையமாகக் கொண்ட புதிய சுற்றுலா அபிவிருத்தித் திட்டம்!

தம்புள்ளை – சிகிரியா மற்றும் திருகோணமலை பகுதிகளை மையமாகக் கொண்டு நிலையான சுற்றுலாத் துறை அபிவிருத்தித் திட்டம் (STSDP) இலங்கை அரசாங்கத்தினால் உத்தியோகபூர்வமாக ஆரம்பிக்கப்பட்டுள்ளது.

ஆசிய அபிவிருத்தி வங்கியின் (ADB) 30 மில்லியன் டொலர் கடன் நிதியுதவியுடன் முன்னெடுக்கப்படும் இத்திட்டம், போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் தலைமையில் நடைமுறைப்படுத்தப்படுகிறது.

வனவிலங்கு திணைக்களம், வனப் பாதுகாப்புத் திணைக்களம், மத்திய மாகாண சபை, மாத்தளை மாவட்ட செயலகம், தம்புள்ளை பிரதேச செயலகம், தம்புள்ளை பிரதேச சபை மற்றும் மத்திய கலாசார நிதியம் உள்ளிட்ட பல்வேறு தரப்பினரின் பங்களிப்புடன் இத்திட்டம் முன்னெடுக்கப்படுகிறது.

சுற்றுலாத் தலங்களின் உட்கட்டமைப்பு வசதிகளை மேம்படுத்துதல், சுற்றுலாத் துறையின் போட்டித்திறனை அதிகரித்தல், நகர சேவைகளை வலுப்படுத்துதல், சுற்றுலாத் தலங்களின் முகாமைத்துவத்தை மேம்படுத்துதல் மற்றும் காலநிலை மாற்றத்துக்கு ஏற்ப தாங்கக்கூடிய சுற்றுலாத் தலங்களை உருவாக்குதல் ஆகியவை திட்டத்தின் முக்கிய நோக்கங்களாகும்.

மேலும், அனைத்து தரப்பினருக்கும் அணுகக்கூடிய மற்றும் உள்ளடக்கமான சுற்றுலா சூழலை உருவாக்குவதும் இத்திட்டத்தின் நோக்கங்களில் ஒன்றாகும்.

தம்புள்ளை – சிகிரியா மற்றும் திருகோணமலை ஆகிய பகுதிகள் அவற்றின் மூலோபாய அமைவிடம் மற்றும் காணப்படும் சுற்றுலா வாய்ப்புகளை கருத்திற்கொண்டு இத்திட்டத்தின் கீழ் அபிவிருத்தி செய்யத் தெரிவுசெய்யப்பட்டுள்ளன.

திட்டத்தின் முதல் தொகுப்பின் கீழ் 5 முக்கிய துணைத்திட்டங்கள் முன்னெடுக்கப்படவுள்ளன.

இதில் புதிய கிராமப் பகுதியில் வாகனத் தரிப்பிடத்தை மேம்படுத்துதல், செஞ்சுரி பாதையை புனரமைத்தல், சிகிரி ஏரியை மேம்படுத்துதல், சிகிரியா வெளிநாட்டு சுற்றுலாப் பயணிகளுக்கான வாகனத் தரிப்பிடத்தை மேம்படுத்துதல் மற்றும் சிகிரி அருங்காட்சியக வளாகம் மற்றும் திறந்தவெளி அரங்க வசதிகளை மேம்படுத்துதல் ஆகியவை அடங்குகின்றன.

இத்துணைத்திட்டங்கள் 18 மாத ஒப்பந்த காலத்திற்குள் நிறைவு செய்ய திட்டமிடப்பட்டுள்ளதுடன், இதற்காக ரூ.1,206 மில்லியன் செலவிடப்படவுள்ளது.

இரண்டாவது தொகுப்பின் கீழ் மேலும் 4 முக்கிய துணைத்திட்டங்கள் நடைமுறைப்படுத்தப்படுகின்றன.

மாபகல பாதுகாப்பு மற்றும் அபிவிருத்திப் பணிகள், பிடுரங்கல பாதுகாப்பு மற்றும் அபிவிருத்திப் பணிகள், கறுப்பு நீர்க்குளம் பாதுகாப்பு மற்றும் அபிவிருத்திப் பணிகள் மற்றும் ராமகலையிலிருந்து தல்கோட்டை வரையிலான 11 கிலோமீற்றர் நீளமான Heritage Trail அமைத்தல் ஆகியவை இதில் அடங்குகின்றன.

30 மாத ஒப்பந்த காலத்தில் முன்னெடுக்கப்படவுள்ள இத்திட்டங்களுக்கு ரூ.1,085 மில்லியன் செலவிடப்படவுள்ளது.

இத்திட்டங்களின் மூலம் தம்புள்ளை – சிகிரியா மற்றும் அதனைச் சூழ்ந்த பகுதிகளில் சுற்றுலா உட்கட்டமைப்பு, பாரம்பரியப் பாதுகாப்பு மற்றும் சுற்றுலாப் பயணிகளுக்கான வசதிகள் மேலும் மேம்படுத்தப்படவுள்ளன.