நுவரெலியா மாநகர சபையின் கரளிய நலன்புரிச் சங்கம் ஏற்பாட்டில் 1,200 மாணவர்களுக்கு ஊக்குவிப்பு நிகழ்ச்சி!

போதைப்பொருள் மற்றும் தொழில்நுட்பத்தின் தவறான பயன்பாட்டிலிருந்து சிறுவர்களைப் பாதுகாப்பதே நோக்கம் – தலைவர் ரிஸான் லன்த்ரா

நுவரெலியா கல்வி வலயத்தைச் சேர்ந்த சுமார் 1,200 பாடசாலை மாணவர்களின் பங்கேற்புடன் சிறுவர்களுக்கான விசேட ஊக்குவிப்பு நிகழ்ச்சியொன்று நேற்று (06) காலை 10 மணிக்கு நடைபெற்றது.

நுவரெலியா மாநகர சபையின் கரளிய நலன்புரிச் சங்கத்தினால் ஏற்பாடு செய்யப்பட்ட இந்நிகழ்ச்சி, இலங்கை சமூக பொலிஸ் பிரிவின் பொறுப்பதிகாரி மனோஜ் சமரசேகரவினால் முன்னெடுக்கப்பட்டது.

சிறுவர் ஊக்குவிப்பு நிகழ்ச்சிகளை நடத்துவதில் நிபுணத்துவம் பெற்ற மனோஜ் சமரசேகர, மாணவர்களின் ஆளுமை வளர்ச்சி, நேர்மறையான சிந்தனை மற்றும் வாழ்க்கைத் திறன்களை மேம்படுத்துவது தொடர்பில் விளக்கமளித்தார்.

குறிப்பாக, போதைப்பொருள் பாவனைக்கு அடிமையாவதால் ஏற்படும் பாதிப்புகள், சிறுவர் துஷ்பிரயோகங்களைத் தடுக்கும் வழிமுறைகள் மற்றும் கையடக்கத் தொலைபேசிகள், இணையம், சமூக ஊடகங்களின் தவறான பயன்பாட்டினால் ஏற்படும் ஆபத்துகள் குறித்து மாணவர்களுக்கு விழிப்புணர்வு ஏற்படுத்தப்பட்டது.

இதன்போது கருத்துத் தெரிவித்த கரளிய நலன்புரிச் சங்கத்தின் தலைவர் ரிஸான் லன்த்ரா, சமூகத்திற்கு பயனளிக்கும் செயற்பாடுகளை முன்னெடுப்பதே தமது சங்கத்தின் பிரதான நோக்கம் எனக் குறிப்பிட்டார்.

“தற்போதைய காலகட்டத்தில் சிறுவர்கள் தொழில்நுட்பத்திற்கு அடிமையாகும் போக்கும், போதைப்பொருள் பாவனைக்கு அவர்கள் ஈர்க்கப்படும் அபாயமும் அதிகரித்து வருகின்றன.

இத்தகைய ஆபத்துகளிலிருந்து சிறுவர்களைப் பாதுகாத்து, அவர்களுக்கு சரியான வழிகாட்டுதல்களை வழங்க வேண்டியது அவசியமாகும்.

இதனைக் கருத்திற்கொண்டே இம்முறை பாடசாலை மாணவர்களை இலக்காகக் கொண்டு இந்த நிகழ்ச்சியை ஏற்பாடு செய்தோம். சமூகத்திற்கு பயனுள்ள இத்தகைய பணிகளை எதிர்காலத்திலும் தொடர்ந்து முன்னெடுக்க எதிர்பார்க்கிறோம்” என அவர் தெரிவித்தார்.